5. สมฺพุลกจฺจานตฺเถรคาถา
[189]
‘‘เทโว จ วสฺสติ เทโว จ คฬคฬายติ,
เอกโก จาหํ เภรเว พิเล วิหรามิ;
ตสฺส มยฺหํ เอกกสฺส เภรเว พิเล วิหรโต,
นตฺถิ ภยํ วา ฉมฺภิตตฺตํ วา โลมหํโส วาฯ
[190]
‘‘ธมฺมตา มมสา ยสฺส เม, เอกกสฺส เภรเว พิเล;
วิหรโต นตฺถิ ภยํ วา, ฉมฺภิตตฺตํ วา โลมหํโส วา’’ติฯ
… สมฺพุลกจฺจาโน [สมฺพหุลกจฺจาโน (ก.)] เถโร…ฯ
6. นิตกตฺเถรคาถา
[191]
[อุทา. 34 อุทาเนปิ] ‘‘กสฺส เสลูปมํ จิตฺตํ, ฐิตํ นานุปกมฺปติ;
วิรตฺตํ รชนีเยสุ, กุปฺปนีเย น กุปฺปติ;
ยสฺเสวํ ภาวิตํ จิตฺตํ, กุโต ตํ ทุกฺขเมสฺสติฯ
[192]
‘‘มม เสลูปมํ จิตฺตํ, ฐิตํ นานุปกมฺปติ;
วิรตฺตํ รชนีเยสุ, กุปฺปนีเย น กุปฺปติ;
มเมวํ ภาวิตํ จิตฺตํ, กุโต มํ ทุกฺขเมสฺสตี’’ติฯ
… นิตโก [ขิตโก (สี. สฺยา.)] เถโร…ฯ
7. โสณโปฏิริยตฺเถรคาถา
[193]
‘‘น ตาว สุปิตุํ โหติ, รตฺติ นกฺขตฺตมาลินี;
ปฏิชคฺคิตุเมเวสา, รตฺติ โหติ วิชานตาฯ
[194]
‘‘หตฺถิกฺขนฺธาวปติตํ , กุญฺชโร เจ อนุกฺกเม;
สงฺคาเม เม มตํ เสยฺโย, ยญฺเจ ชีเว ปราชิโต’’ติฯ
… โสโณ โปฏิริโย [เสลิสฺสริโย (สี.), โปฏฺฏิริยปุตฺโต (สฺยา.)] เถโร …ฯ
8. นิสภตฺเถรคาถา
[195]
‘‘ปญฺจ กามคุเณ หิตฺวา, ปิยรูเป มโนรเม;
สทฺธาย ฆรา นิกฺขมฺม, ทุกฺขสฺสนฺตกโร ภเวฯ
[196]
‘‘นาภินนฺทามิ มรณํ, นาภินนฺทามิ ชีวิตํ;
กาลญฺจ ปฏิกงฺขามิ, สมฺปชาโน ปติสฺสโต’’ติฯ
… นิสโภ เถโร…ฯ
9. อุสภตฺเถรคาถา
[197]
‘‘อมฺพปลฺลวสงฺกาสํ, อํเส กตฺวาน จีวรํ;
นิสินฺโน หตฺถิคีวายํ, คามํ ปิณฺฑาย ปาวิสิํฯ
[198]
‘‘หตฺถิกฺขนฺธโต โอรุยฺห, สํเวคํ อลภิํ ตทา;
โสหํ ทิตฺโต ตทา สนฺโต, ปตฺโต เม อาสวกฺขโย’’ติฯ
… อุสโภ เถโร…ฯ
10. กปฺปฏกุรตฺเถรคาถา
[199]
‘‘อยมิติ กปฺปโฏ กปฺปฏกุโร, อจฺฉาย อติภริตาย [อติภริยาย (สี. ก.), อจฺจํ ภราย (สฺยา.)];
อมตฆฏิกายํ ธมฺมกฏมตฺโต [ธมฺมกฏปตฺโต (สฺยา. ก. อฏฺฐ.), ธมฺมกฏมคฺโค (สี. อฏฺฐ.)], กตปทํ ฌานานิ โอเจตุํฯ
[200]
‘‘มา โข ตฺวํ กปฺปฏ ปจาเลสิ, มา ตฺวํ อุปกณฺณมฺหิ ตาเฬสฺสํ;
น หิ [น วา (ก.)] ตฺวํ กปฺปฏ มตฺตมญฺญาสิ, สงฺฆมชฺฌมฺหิ ปจลายมาโนติฯ
… กปฺปฏกุโร เถโร…ฯ
วคฺโค จตุตฺโถ นิฏฺฐิโตฯ
ตสฺสุทฺทานํ –